इचलकरंजी शहरातील भारतमाता सोसायटी परिसरातील रस्त्यांची अत्यंत दयनीय अवस्था झाली असून नागरिकांना रोज जीव मुठीत धरून प्रवास करावा लागत आहे. विविध कामांसाठी खोदण्यात आलेले रस्ते अद्याप पूर्ववत करण्यात आले नसल्याने संपूर्ण परिसरात खड्डे आणि चिखलाचे साम्राज्य पसरले आहे. यामुळे वाहनचालक, विद्यार्थी, महिला आणि ज्येष्ठ नागरिकांना मोठा त्रास सहन करावा लागत असून स्थानिक नागरिकांनी प्रशासन आणि लोकप्रतिनिधींविरोधात तीव्र नाराजी व्यक्त केली आहे भारतमाता सोसायटी परिसरात पाणीपुरवठा, ड्रेनेज किंवा इतर विकासकामांसाठी रस्ते खोदण्यात आले होते. मात्र काम पूर्ण झाल्यानंतर रस्त्यांचे पॅचवर्क किंवा डांबरीकरण करण्यात आले नाही. परिणामी पावसाळ्यात या ठिकाणी मोठ्या प्रमाणात चिखल आणि खड्डे निर्माण झाले आहेत.रस्त्यावरील खड्ड्यांमध्ये पाणी साचत असल्याने वाहनचालकांचा अंदाज चुकून दुचाकी घसरत आहेत. अनेक विद्यार्थी शाळा आणि महाविद्यालयात जाताना या रस्त्यावरून प्रवास करतात. तसेच महिला आणि ज्येष्ठ नागरिकांनाही चालताना मोठी कसरत करावी लागत आहे. काही ठिकाणी नागरिक पडून किरकोळ जखमी झाल्याच्या घटनाही घडल्या आहेत.स्थानिक नागरिकांच्या मते, अनेक वेळा संबंधित विभाग आणि लोकप्रतिनिधींकडे तक्रारी करूनही कोणतीही ठोस कारवाई करण्यात आलेली नाही. परिसरातील आमदार, नगरसेवक आणि संबंधित अधिकाऱ्यांनी या प्रश्नाकडे गांभीर्याने लक्ष देऊन तातडीने रस्त्यांची दुरुस्ती करावी, अशी मागणी नागरिकांनी केली आहे.पावसाळा सुरू झाल्याने परिस्थिती आणखी गंभीर बनली असून वेळेत उपाययोजना न केल्यास मोठा अपघात होण्याची भीती व्यक्त केली जात आहे. त्यामुळे प्रशासनाने तातडीने दखल घेऊन खड्डे बुजवावेत आणि रस्त्यांचे पॅचवर्क पूर्ण करावे, अशी मागणी परिसरातील नागरिकांकडून होत आहे.